Posicion di SNBA pa cu e Rijksfinancieel toezicht
San Nicolas: Despues di a asisti na un reunion convoca pa gobierno di Aruba conhuntamente cu gremionan, ngo’s, sindicatonan y demas invitadonan dia 8 di Juli ultimo cu proposito pa jega na un acuerdo den cuadro di atende cu e situacion cu Aruba ta enfrentando particularmente riba e hecho cu den un forma unilateral Hulanda un biaha mas kier impone control absoluto riba nos islanan. directiva di SNBA a sinta immediatamente cu tur miembro di directiva pa tuma un postura basa riba e informacionan cu nos a ricibi riba e topico di e ponencianan di Hulanda pa Aruba por ricibi e siguiente fase di subsidio pa Aruba por cubri cu su compromisonan.
Na prome lugar e ta e pensamento di SNBA, cu solamente den un forma solidario, caminda ta laga diferencian un banda y enfoca como un solo Aruba, tanto Gobierno, opositornan, gremio y NGO’s cu un solo enfoque, esta; bienestar general di Aruba di un forma enfatico reacciona ariba ponencia tirano di Hulanda.
Desde e ultimo imposicion di Hulanda instalando na Aruba e asina yama CAFT, Aruba a hasi peticion pa institui un organo di arbitrahe cu lo atende cu futuro disputanan entre e partnersnan den reino.
Deliberadamente, Hulanda ta hasi caso omiso di esaki y awe atrobe ta mustra e necesidad di dicho organo.
Directiva di SNBA ta di opinion cu Hulanda inhustamente ta skohe un momento mei mei di un pandemia mundial pa pone su partnernan den reino na rudia cu un deadline pa tuma un desicion den menos di un siman pasobra gobierno y parlamento Hulandes ta baha cu vakantie sin importa e impacto y repercusiones di esaki.
SNBA ta sostene e asercamento cu Hulanda pa nos prome Minister y ta kere den habri e caminda pa negociacionan pa cu Aruba su condicionan relaciona cu duna Hulanda e control financiero di Aruba. Aruba en general ta conciente di necesidad financiero y tambe conciente cu no ta posibel di sali di e crisis financiero y economico sin asistencia di Hulanda y pa es motibo SNBA ta propone pa Aruba manifesta di ta di acuerdo cu e control financiero sinembargo e control mester bin cu cierto condicionan:
1 Garantia di sanea Finansas y e economia di Aruba den e periodo proponi door di Hulanda cu ta pa 7 aña.
2 Un entrega sin demora di autonomia back na Aruba despues di dicho periodo di 7 aña!
3 Cambio of amplia e rol di funcion caminda cu Aruba tambe por lanta/tin un instituto di supervision pa percura cu e institutonan di Hulanda esta CAFT y LAFT den nan maneho di control lo cumpli debidamente.
4 Elimina tur posibilidad pa un renovacion di e acuerdo unico aki.
5 Instalacion di caracter immediato di organo di arbitrahe menciona den punto 3
6 Si no logra cu punto 1, garantisa Aruba un prestamo sin interes pa Aruba retoma control y sigui su destino como partner igual den Reino.
7 Aruba mester por continua negociashonan cu inversionistanan actual y tin e libertad pa queda trece inversionistanan local y internacional.
Tin mas punto di interes cu nos directiva a toca pero ta nos intencion pa acerca nos partnernan di gremio, sindicatonan, NGO’s y otronan pa nos UNI en bloke pa fiha un posicion unilateral pa cu e situacion aki.
Atentamente.
Directiva di San Nicolas Business Association.